(Last Updated On: 9 november 2018)05-11-2018
‘Ózze Sjaak is euverleeje’. Det waas ‘t zieër dreuvige berich det we dees waek óntvinge van de femilie Holtermans. Maar leefs 47 jaor lang waas Sjaak vuul mièr dan zoeëmaar lid van FCV…
Sjaak waas ‘ne jónge twintiger wie hae, begin jaore 70, debuteerde beej FCV op d’n Boswachterswaeg. Hae bleek gèn groeët talent, maar compenseerde det met vuul gooije wil en echte teamspirit. Hae bleef ouk tamelik lang actief as voetballer, in ós herinnering vreejwaal altièd as back wao hae ‘t risico van de voetballende oplossing neet oèt de waeg ging, getuùge ouk ziene voetbal-beejnaam ‘Hackentrick’…
Al vlot ging Sjaak zich naeve ‘t voetballe op andere wiès verdeenstelijk make veur de club. Ièrs in de begeleiding en training, waoveur hae nog ‘n trainersdiploma haolde. Later as grensrechter, lid van de bouwkemmissie, archivaris, wedstriedsikkertaris, redacteur van ós clubblaad en zelfs bestuurslid. Hae waas de schrièver van ós boerebroèlofsleed in 2010. Um kort te gaon, ‘ne échte en multifunctionele clubman…
We hadde Sjaak al ‘ne hièlen tièd nimmer gezeen op d’n Arenborg. We wiste det ‘t met zien gezondheid neet te bes waas. Des te bliejer ware we wie hae 2 waeke geleeje beej d’n thoèswedstrijd van ós ièrste weer ens van de partie waas. Hae goof aan, aan baeterende hand te zien . Spraokzaam en vol gemeinde interesse in ós club. Hae goof ós werme komplemente euver wie we met de club bezig ware en waas oprech gruuëts op ós fantastische jeugaafdeiling. Hoewaal we ‘t allemaol gaer anders hadde gezeen is ‘t beej deze letste kièr gebleve…
Names FCV winse weej de femilie Holtermans, vrinde en bekinde van Sjaak hièl vuuël sterkte toe um ‘t verleer van deze bizondere mins te kinne verwerke. Weej zulle Sjaak, met alles wat hae veur ós club beteikend haet, met groeët respek gedinke.
